රථගාය නොමැති ඇමතිවරුන්ද දුටුවෙමි!
රථගාය නොමැති ඇමතිවරුන්ද දුටුවෙමි!
ජවිපෙ අමතිධූර,දැරූ වකවානුවේ ඔවුන් අමාත්යාංශයවල වාහන පාවිච්චි කිරීම පිලිබඳ හිටපු අමාත්යාංශ ලේකම් A.P.A
.ගුණසේකර මහතා තැබූ ෆේස්බුක් සටහනක්....
රථගාය නොමැති ඇමතිවරුද දුටුවෙමි .
හිටපු රාජ්ය අමාත්යවරුන්ගේ රාජකාරි වාහන ආපසු ඒ ඒ අමාත්යාංශ වෙත ලබා ගැනීමට තිබූ බාධක පිළිබඳව පසුගිය දිනවල ජනමාධ්ය මඟින් ජනතාව වෙත වාර්තා වුනා . බොහෝ විට ජනතාව සිතනුයේ සියලුම ඇමතිවරු එම ගනයේ කියායි . ඇමතිවරුන් හා ඔවුන්ගේ ගොලබාලයන්ගේ වාහන තණ්හාව ගැන නිලධාරීන් භාවිතා කරන වචනය තමයි රථගාය . නමුත් එසේ නොවූ ඇමතිවරු කීප දෙනෙක් පිළිබඳව මගේ මතකයේ තියෙනව . මට හිතුනා ඒ පිළිබඳව මෙහි පෝස්ටුවක් පළ කළොත් හොඳයි කියල .
මම සංස්කෘතික අමාත්යාංශයේ ජ්යෙෂ්ඨ සහකාර ලේකම්වරයෙකු වශයෙන් සේවය කළ අවධියේ මගේ ඇමති වරයා වුනේ මොන්ටි ගොපල්ලව මහතා . උගත් වැදගත් ගතිගුණ තිබුනු ඇමතිවරයෙක් . ඔහු විනයක් ඇතිව කටයුතු කළ කෙනෙක් . මගේ මතකය අනුව මොන්ටි ගොපල්ලව ඇමතිවරයාට රථගාය වැලඳිලා තිබුනෙ නැහැ .
මම අධ්යාපන අමාත්යාංශෙ අතිරේක ලේකම් වශයෙන් සේවය කළ අවධියේ මගේ ඇමතිවරයා වුනේ ආචාර්ය කරුණාසේන කොඩිතුවක්කු මහතායි . ඔහුත් උගත් වැදගත් ගතිගුණ තිබුනු විනයක් ඇතිව කටයුතු කළ ඇමතිවරයෙක් . මගේ මතකය අනුව කරුණාසේන කොඩිතුවක්කු මහතාටත් රථගාය වැලඳිලා තිබුනෙ නැහැ . එක් අවස්ථාවකදි ඔහුගේ පක්ෂයේම දේශපාලනඥයෙක් රාජකාරි රථය භාර නොදී එය මැතිවරණ කටයුතු සඳහා භාවිතා කරමින් තිබූ අවස්ථාවෙ එය ලබා ගැනීමට මා පොලීසියේ පැමිණිලි කරන බව කිව්වම , කොඩිතුවක්කු මහතාගෙන් මට ලැබුන පිළිතුර තමයි " මම බාධා කරන්නෙ නෑ . ගුණසේකර නීතියට අනුව තමන්ගෙ රාජකාරිය කරන්ඩ " කියන එක . ඒ අනුව මගේ නිලධාරීන් පොලීසියෙ පැමිණිල්ලක් කළා . දවස් දෙකක් යන කොට ඒ දේශපාලනඥයා වාහනය අමාත්යාංශයට බාර දුන්නා .
වාහන පිළිබඳ සුවිශේෂම අත්දැකීම මම ලැබුවේ සංසකෘතික හා ජාතික උරුම අමාත්යාංශයේ ලේකම් වශයෙන් මා සේවය කළ අවධියේ මගේ ඇමති වූ විජිත හේරත් මහතා වෙතින් හා නියෝජ්ය ඇමති වූ සමන්ත විද්යාරත්න මහතා වෙතින් . ඔවුන් දෙදෙනාත් උගත් වැදගත් ගතිගුණ තිබුනු දැඩි විනයක් ඇතිව කටයුතු කළ දෙදෙනෙක් . ඒ අත්දැකීම අනන්යයි . එනිසා එය මම පහතින් විස්තර කරනව .
ඒ දෙන්න රාජකාරි බාර ගන්ඩ 2004 . 04 . 30 වැනි දින අමාත්යාංශයට පැමිණියේ ඔවුන්ගේ පක්ෂයට අයත් තරමක් පැරණි ඩබල් කැබ් රථයකින් සහපිරිවර කවුරුවත් නැතිව . එදා හවස් වරුවෙ මම ගිහින් ඔවුන්ට කිව්වා " ඔබ තුමන්ලගෙ වාහන සූදානම් . ඇවිත් බලල ඒවා බාරගන්න" කියල . එතකොට මට ලැබුන පිළිතුර තමයි
"ලේකම් තුමා අපට හදිස්සියක් නැහැ . පස්සෙ බලමු " කියන එක .
සති දෙකකට විතර පස්සෙ ඇමතිවරයා මට කතා කරල කිව්ව " ලේකම් තුමා අර අපට තියෙනවයි කිවිව වාහන අපි බලමුද " කියල . මම හා කියල පැය දෙකක් වෙලාව ඉල්ල ගත්තා , ගරාජවලින් වාහන එළියට අරගෙන දූවිලි පිහදමල එවා සූදානම් කරන්ඩ . මම ඒ වැඩ ටික කරවල වාහන පෙලට තියල ඇමති හා නියෝජ්ය ඇමති දෙදෙනාට ආරධනා කළා වාහන බලන්ඩ යං කියල . මාත් එක්ක විෂය බාර මගේ නිලධාරීනුත් ආවා .
මගේ මතකය නිවැරදි නම් එතැන වාහන 15 ක් විතර තිබුනා . ඒ වගේම ඒවා බෙන්ස් , වොල්වෝ , නිසාන් සෙඩ්රික් හා බීඑම්ඩබ්ලිව් වර්ග වලට අයත් අති සුඛෝපභෝගී වාහන බවයි මගේ මතකය . ඒවා ඉතාමත්ම හොඳ තත්වයේ තිබුනා .
ඇමතිවරයා හා නියෝජ්ය ඇමතිවරයා හෙමින් හෙමින් වාහන බලමින් වටයක් දෙකක් ගියා . ඊට පස්සෙ මගෙන් ඇහුවා " ලේකම් තුමා අපිට මේවයෙ යන්ඩ පුළුවන්ද ? " කියල . මට පුදුම හිතුනා . මට ක්ෂණිකව හිතුනා " මේ යක්කු ස්ටෙජ්වල සමාජවාදය ඇද බානව . ඒ වුනාට කෙරුවාව මෙහෙමයි . මේ ගොල්ලන්ටත් අර අනෙක් පක්ෂවල සමහර අයට තියෙන රෝගෙ , ඒ කියන්නෙ කලින් ඇමතිවරු භවිතා කරපු වාහන භවිතා කිරීමට තියෙන නොකමැත්ත තියෙනව " කියල . මගේ මුහුනේ ඇති වුනු වෙනස දැකල විජිත හේරත් ඇමතිවරයා මෙහෙම කිව්වා . " ලේකම් තුමා අපි මේ තනතුරුවලට තෝරල පත් කරල එව්වෙ මේ රටේ දුප්පත් මහජනයා . ඒ මිනිස්සු ගමනක් යන්ඩ ගියාම බස්හෝලට්වල වැස්සට තෙමෙනව . අව්වට වේලෙනවා . දූවිලි කාගෙන බස් එකක් එනකම් ඉන්නවා . බස් එකට නැග්ගට පස්සෙ කාන්තාවකට ආත්ම ගෞරවය රැකගෙන යන්ඩ බැහැ . මහජනයා තදවෙලා දාඩිය දාගෙන යන්ඩ ඔනෑ . ඉතින් අපිව පත් කරපු මහජනයා එහෙම පීඩා විඳිද්දි අපි කොහොමද මේ වගේ සුඛෝපභෝගී වාහනවල යන්නෙ ? අපිට ලැජ්ජාවක් තියෙනව " කියල . මේ වචන අහල මම පුදුම වුනා . මට මගේ කන් අදහ ගන්ඩ බැරිව ගයා . ඒ ගමන සමන්ත විද්යාරත්න නියෝජ්ය ඇමතිවරයා කියනව
" මේ වාහන අපේ අමාත්යාංශයේවත් තියා ගන්ඩ එපා . ඕවා ජනාධිපති කාර්යාලයයට යවල දාන්ඩ " කියල . ඒ ගමන මම ඇහවා
" එතකොට ඔබ තුමන්ලට වාහන කෝ " කියල . " අපි දෙන්නට ඩබල් කැබ් දෙකක් දෙන්ඩ ඒ හොඳටම ඇති " කියල විජිත හේරත් ඇමතිවරයා කිව්වා.
ඒ උපදෙස් අනුව අපි අර වාහන භාර ගන්ඩ කියල ජනාධිපති කාර්යාලයයට එදාම දැන්වුවා . අපරාදෙ කියන්ඩ බෑ පස්සෙන්දම ඒගොල්ලො ඇවිත් වාහන ටික අරගෙන ගියා . සංස්කෘතික අමාත්යාංශයේ තිබිච්ච හොඳම ඩබල් කැබ්ස් තුන කලින් හිටපු නියෝජ්ය ඇමතිවරයෙක් අරගෙන ගිහිල්ල ආපහු බාර දීල නැහැ . ඒවයෙ ෆයිල් අමාත්යාංශෙ තියෙනව . හැබැයි වාහන නැහැ . ඒවට මොනව වුනාද කියල කිසි කෙනෙක් දන්නෙ නැහැ . ඉතින් මොනව කරන්ඩද ? නිලධාරීන්ට රාජකාරි සඳහා තිබුනු පරණ ඩබල් කැබ්ස් දෙකක් වහාම රෙපයාර් කරල ඒ දෙන්නට දුන්නා . ඔවුන්ගේ කාර්ය මණ්ඩලයටත් චක්රලේඛය අනුව , පරණ වාහනම දුන්නා
ඇමතිවරයයි නියෝජ්ය ඇමතිවරයයි යන වාහන පරණ නිසා මඟදි කැඩෙනව . එහෙම වුනාම මට ටෙලිෆෝන් කරනව වෙන වාහනයක් එවන්ඩ කියල . ඒ අතරෙ අමාත්යාංයේ නිලධාරීන් කනුකුනුගානව ඒ ගොල්ලන්ට රාජකාරියට වාහන නැහැ කියල . බැරිම තැන මුදල් අමාත්යාංශෙ ලේකම්ට මම විස්තරේ කියල යැව්වා මේ ඇමති , නියෝජ්ය ඇමති දෙන්නට අළුත් ඩබල් කැබ්ස් දෙකක් මිලදී ගන්ඩ මුදල් ප්රතිපාදන ඉල්ලල . එම ඉල්ලීම සාර්ථක වුනා . පස්සෙ අපි නියමිත පටිපාටිය අනුව ටොයෝටා ඩබලි කැබ්ස් දෙකක් මිළ දී ගෙන මේ දෙපලට බාර දුන්නා .
මේ ඇමති ජෝඩුව රාජකාරි ආරම්භ කළේ අප්රියෙල් 30 වැනිදා . ඔක්තෝබර් මාසෙ දිනක
මගෙන් අහනව " ලේකම් තුමා අපි දෙන්නගෙ ඉන්ධනවලට වෙන් කරපු මුදල් කොච්චර ඉතිරි වෙලා තියෙනවද ? කියල . මම ප්රධාන ගණකාධිකාරී ගෙන්නල ඉතිරි මුදල කිව්වා . බොහෝම සුළු ප්රතිශතයක් තමයි වැය වෙලා තිබුනෙ . ඒ ගමන ඇමති විජිත හේරත් මහතා කියනව " ලේකම් තුමා අපේ සංස්කෘතික මධ්යස්ථානවල ඉන්න දුප්පත් දරුවොන්ට සංදර්ශනේකටවත් යන්ඩ බස් එකක් නැහැ නේද ? අපිට ඉන්ධනවලට වෙන් කරපු සල්ලිවලින් අමාත්යාංශෙට දොර දෙකේ ලොකු බස් දෙකක් ගන්ඩ " කියල . මම කිව්වා " අනේ ඇමති තුමා වැඩේ හොඳ වුනාට ගැටළුවක් තියෙනව . නිලධාරී වාදය කියල නම් කියන්ඩ එපා . මුදල් රෙගුලාසි අනුව පුනරාවර්තන මුදල්වලින් ප්රාග්ධන වියදම් දරන්ඩ බැහැ . මම අමාරුවෙ වැටෙනව " කියල . පස්සෙ අපි මුදල් අමාත්යාංශෙ ලේකම්ට විස්තරේ දන්වල විශේෂ අනුමැතියක් පැතුව . බස් දෙකේ ප්රමාණයට අපේ ඉන්ධන මුදල් එම අමාත්යාංශයට අරගෙන දොර දෙකේ ලොකු බස් එකක් ගන්ඩ අපිට මුදල් දෙන්ඩ මුදල් අමාත්යාංශෙ ලේකම් ක්රියා කළා .
අපි ටෙන්ඩර් පටිපාටියට අනුකූලව ලොකු බස් එකක් මිළ දී ගත්ත , අමාත්යාංශයේ හා සංස්කෘතික මධ්යස්ථානවල කටයුතු සඳහා .
අපි ඒ බස් එකේ පිටිපස්සෙ ලිව්වා , මේ බස් එක මිළ දී ගත්තෙ සංස්කෘතික හා ජාතික උරුම ඇමතිවරයගෙ හා නියෝජ්ය ඇමතිවරයගෙ ඉන්ධනවලට වෙන් වුන මුදල්වලින් කියල . එම බස් එක අමාත්යාංශෙ කටයුතුවලට බොහෝම ප්රයෝජනවත් වුනා . කිසිම දවසක ඉන් බරහැරව දේශපාලන කටයුතුවලට එය යෙදෙව්වෙ නැහැ . මේ බස් එක මෑතකදි මම දැක්කා . හැබැයි අර පිටිපස්සෙ ලිව්ව වගන්තිය එහි තිබුනෙ නැහැ . ඒක මකල දමල .
මේ පෝස්ටුව ටිකක් දීර්ඝ වුනා . ඒ වුනත් මේ විස්තර ඔබට කීම කාලීන අවශ්යතාවයක් කියල මම හිතනව . මොකද මේ රටේ රථගාය නැති මැති ඇමතිවරුත් හිටිය කියල පැහැදිලි කරන්ඩ .
Comments
Post a Comment