ෆේස්බුක් එක රටට සහ ජනාධිපතිවරයාට ගරහනවා -පොලීසියට පැමිණිල්ලක් -

 ෆේස්බුක් එක රටට සහ  ජනාධිපතිවරයාට ගරහනවා  -පොලීසියට පැමිණිල්ලක් -

ශ්‍රී ලංකා රජයේ සහ ජනාධිපති ගෝඨාභය රාජපක්ෂ මහතාගේ කීර්තිනාමය ජාත්‍යන්තර වශයෙන් කැළලක් සිදුකිරීමට කටයුතු කරමින් සිටින බවට චෝදනා කරමින් ශ්‍රී ලංකා පොලිසියට පැමිණිල්ලක් කර තිබේ.

මේ පැමිණිල්ල සිදුකර ඇත්තේ ජනාධිපති මාධ්‍ය අංශයේ හිටපු නියෝජ්‍ය අධ්‍යක්ෂවරයෙකු හා ඉකුත් පාර්ලිමේන්තු මැතිවරණයේදී එජාපයෙන් කොළඹ දිස්ත්‍රික්කයට තරඟ වැඳුණු ඕෂල හේරත් මහතා විසිනි.

ඔහු පෙන්වාදී ඇත්තේ ෆේස්බුක් සමාගමට අයත් භයානක පුද්ගලයින් සහ සංවිධාන ලැයිස්තුවට එකම රටක් එකම නීතියක්’ සඳහා වූ ජනාධිපති කාර්ය සාධක බලකායේ සභාපතිවරයා හා බොදු බල සේනා සංවිධානයේ ලේකම් පූජ්‍ය ගලබොඩඅත්තේ ඥානසාර හිමිගේ නම ඇතුළත් කිරීමෙන් මෙය සිදුකර ඇති බවයි.

ඥානසාර හිමිගේ නම එම ලයිස්තුවට ඇතුළත් කර ඇත්තේ 2018 වසරේ සිට ශ්‍රී ලංකාව හා සම්බන්ධව ප්‍රතිපති කලමනාකරුවන් ලෙස ෆේස්බුක් සමාගම නීතිඥ සෙනුර අබේවර්ධන (https://www.linkedin.com/in/senura-abeywardena-934862107/) සහ ආචාර්ය යසස් විශුද්ධි අබේවික්‍රම (https://www.linkedin.com/in/dr-yasas-vishuddhi-abeywickrama/) යන අය පත්කර සියදී බවද ඔහුගේ පැමිණිල්ලේ වැඩිදුරටත් දැක්වේ.

(සෙනුර අබේවර්ධන එක්සත් ජාතික පක්ෂයේ හිටපු මහලේකම් හර්ෂ අබේවර්ධන මහතාගේ පුත්‍රයාය)

ෆේස්බුක් සමාගම විසින් පවත්වාගෙන යනු ලබන, මෑතකදී ජාත්‍යන්තර මාධ්‍ය මගින් ප්‍රසිද්ධියට ලක්කරන ලද භයානක පුද්ගලයින් සහ සංවිධාන ලැයිස්තුව තුල ශ්‍රී ලංකාවට අයත් සංවිධාන 3ක නම් අඩංගු කර ඇති බවත්, එහි ඇතුළත් අනෙක් නම් දෙක වන්නේ ඊළාම් විමුක්ති කොටි සංවිධානය (LTTE) හා සිංහලේ ජාතික බලමුළුව යන සංවිධාන බවයි.

තවද ෆේස්බුක් ආයතනය, ශ්‍රී ලංකා රජය මගින් තහනම් කර ඇති, 2019 පාස්කු ඉරිදා බෝම්බ ප්‍රහාරයට සෘජුව වගකිව යුතු ත්‍රස්තවාදී සහරාන් හෂීම් සහ අන්තවාදී ජාතික තවුහිද් ජමාත් සංවිධනය එම ලැයිස්තුවට ඇතුළත් කිරීමට කටයුතු කර නොමැති බවද ඔෂල මහතා සිය පැමිණිල්ල මගින් පෙන්වා දී තිබේ.

එහි වැඩිදුරටත් මෙසේද සඳහන් වේ.

" බහුතර බෞද්ධ ජනතාවක් සිටින ශ්‍රී ලංකාවේ, රජය මගින් ඉතා ඉහල පිළිගැනීමක් සහ ගෞරාවයක් ලබා දෙමින් ‘එකම රටක් එකම නීතියක්’ සඳහා වූ ජනාධිපති කාර්ය සාධක බලකායේ සභාපතිවරයා ලෙස පත්කර ඇති පූජ්‍ය ගලබොඩඅත්තේ ඥානසාර හිමියන් නායකත්වය දරණ බොදු බල සේනා සංවිධානය භයානක සංවිධාන ලෙස නම් කර, ශ්‍රී ලංකා රජය ත්‍රස්තවාදීයකු ලෙස නම් කර ඇති සහරාන් හෂීම් සහ අන්වාදී සංවිධානයක් ලෙස තහනම් කර ඇති ජාතික තවුහිද් ජමාත් සංවිධනය එසේ නම් නොකිරීම මගින් ශ්‍රී ලංකාව තුල වාසය කරන ජාතින් අතර අනවබෝධය, අසමගියක් සහ වෛරයක් ඇතිකිරීමට කටයුතු කර තිබේ."

ඒ අනුව මගේ මෙම ලියවිල්ල පැමිණිල්ලක් සේ සලකා මේ පිළිබද කඩිනම් ආපක්ෂපාති විමර්ශනයක් සිදුකර ෆේස්බුක් ආයතනය හෝ වගකිව යුතු නිලධාරීන්ට එරෙහිවද නිතිය ක්‍රියාත්මක කරන මෙන් ඉල්ලමි.

සෙනුරට ලියුම දැම්මම මට ස්ට්‍රයික් 371ක් ආවා - ඕෂල

මේ පැමිණිල්ල සම්බන්ධයෙන් අප ඕෂල හේරත් මහතාගෙන් කළ විමසීකදී ඔහු කියා සිටියේ පොලිසියට පැමිණිලි කිරීමට පෙර තමා ශ්‍රී ලංකාව හා සම්බන්ධව ෆේස්බුක් සමාගමේ ප්‍රතිපති කළමනාකරුවන් ලෙස සිටින නීතිඥ සෙනුර අබේවර්ධන මහතා පසුගිය 16 වැනිදා ලිඛිතව දැනුවත් කළ බවත්, ඉන් පසුව තමාගේ ෆේස්බුක් ගිනුමට ස්ට්‍රයික්ස් 371ක් වැදුන බවයි.

මේ වසරේ තමාට එසේ ස්ට්‍රයික්ස් වැදී තිබුණේ 5ක් පමණක් බවත් ඔහු කියා සිටියේය.

තම පෞද්ගලික ෆේස්බුක් ගිනුම තුළ එක්ලක්ෂ එක්දහසක පිරිසක් සිටින බවත්, තමා විසින් කරනු ලබන තවත් ප්‍රසිද්ධ ෆේස්බුක් ගිනුමක් වන Sri Lankans for Sri Lanka හි ලක්ෂ පහමාර ඉක්මවූ පිරිසක් සිටින බවද ඔහු කියා සිටියේය.