"අනුර හෙළිකළ යුගදනවි හෙලුව"

 "අනුර හෙළිකළ යුගදනවි හෙලුව"

 

කැබිනට් මණ්ඩලයටත් පාර්ලිමේන්තුවටත් ඉදිරිපත් නොකර, ආණ්ඩුව හොර රහසේ අස්සන් කළ නිව් ෆෝට්‍රස් ගිවිසුමේ ඇතුළත් කරුණු හෙළිදරව් කරමින්, ජනතා විමුක්ති පෙරමුණේ, නායක අනුර කුමාර දිසානායක එම ගිවිසුමේ පිටපතක් අය-වැය විවාදය අවසන් දිනයේ පාර්ලිමේන්තුවේදී සභාගත කළේය.

මෙම ගිවිසුම නිව් ෆෝට්‍රස් සමාගම සමඟ අස්සන් කර ඇති බවට කැබිනට් මණ්ඩලය සඳහන් කළත්, එම ගිවිසුම් පිටපතට අනුව එය අස්සන් කර තිබෙන්නේ, ශ්‍රී ලංකා පවර් හෝල්ඩින්ග්ස් නමැති සමාගමක් සමඟ බවත්, එම සමාගමේ ශාඛාවක් ඇමෙරිකාවේ ලියාපදිංචි කර ඇතැයිද දිසානායක මහතා පෙනවා දුන්නේය.

මෙම ගිවිසුම රටට ඉදිරිපත් කරන ලෙසත්, පාර්ලිමේන්තුවට ඉදිරිපත් කරන ලෙසත් දිගින් දිගටම ඉල්ලා සිටි නමුත්, ආණ්ඩුව එය මඟහරිමින් සිටි බවද දැන් එම පිටපත තමාට ලැබී ඇති බැවින් එය සභාගත කරන බවද පැවැසීය.”

“මුදල් අමාත්‍යාංශය විසින් 2021 සැප්තැම්බර් 6 වැනි දින ඉදිරිපත් කරන ලද කැබිනට් පත්‍රිකාව අනුව එහි 8 (2) වගන්තිය අනුව භාණ්ඩාගාර ලේකම්තුමාට බලයක් දෙනවා, ‘නිව් ෆෝට්‍රස් එනර්ජි සමාගම’ සමඟ ගිවිසුම් අස්සන් කරන්න කියලා. මා දන්නා පරිදි ඒ ගිවිසුම පාර්ලිමේන්තුවටවත්, කැබිනට් මණ්ඩලයටවත් ඉදිරිපත් කරලා නැහැ”යි දිසානායක මහතා පැවැසීය.

සෙලර් හැටියට ශ්‍රී ලංකා ආණ්ඩුවත්, බයර් හැටියට ශ්‍රී ලංකා පවර් හෝල්ඩින් සමාගමත් අස්සන් කරපු ගිවිසුම. ශ්‍රී ලංකා රජය වෙනුවෙන් අස්සන් කරලා තිබෙනවා යැයි මන්ත්‍රිවරයා පෙන්වා දුන්නේය.

“මේක පෞද්ගලික දේපළක් පවරාදීමක් නොවෙයි. තමුන්නාන්සේලාගේ යම් බලයක් ඇටෝනි බලපත්‍රයක් හරහා තව කෙනකුට පවරාදීමක් නොවෙයි. මේක රටේ බලශක්ති ක්ෂේත්‍රයක්. මේ වෙනකොටත් රජයේ ආයතන ගණනාවකට හිමිව තිබෙන කෙරවළපිටිය බලාගාරයත් ඇමෙරිකානු සමාගමකට පවරා දීමට සකසනු ලැබූ ගිවිසුමක්” යැයි අනුර කුමාර දිසානායක මහතා පැවැසීය.

“මාස එකහාමාරකට වැඩි කාලයක් මේ ගිවිසුම පාර්ලිමේන්තුවට ඉදිරිපත් කරන්න කිව්වත් කළේ නෑ. කැබිනට් මණ්ඩලයෙන් අවසර දෙන්නේ නිව් ෆෝට්‍රස් එනර්ජි (NFE) කියන සමාගම සමඟ ගිවිසුම අස්සන් කරන්න. හැබැයි අස්සන් කරලා තිබෙන්නේ ශ්‍රී ලංකා පවර් හෝල්ඩින්ග්ස් කියන සමාගම සමඟ. කැබිනට් මණ්ඩලයෙන් බලය දෙන සමාගම සමඟ නෙමෙයි මේක අස්සන් කරලා තියෙන්නේ. ශ්‍රී ලංකා පවර් හෝල්ඩින්ග්ස් කියන සමාගමක් ඇමෙරිකා එක්සත් ජනපදයේ ලියාපදිංචි කරලා තියෙනවා. මම දන්නෑ ශ්‍රී ලංකා හෝල්ඩින්ග්ස් සමාගමක් ඇමෙරිකාවේ රෙජිස්ටර් කරපු සමාගමක්ද කියලා” යැයි හෙතෙම කීය.

ඒ නිසා හරි පැහැදිලියි කැබිනට් මණ්ඩලයේ බලය දුන්නේ නිව් ෆෝට්‍රස් එනර්ජි සමාගමට හැබැයි අස්සන් කරලා තිබෙන්නේ නිව් ෆෝට්‍රස් සමාගමකට අනුබද්ධ හෝල්ඩින් සමාගමක් සමඟ. ඒ නිසා කැබිනට් මණ්ඩලයත් නොමඟ යැවීමක් බව පැහැදිලියි” යැයි මන්ත්‍රිවරයා සඳහන් කළේය.

“මෙහි 13 (1) වගන්තියේ සඳහන් කරල තිබෙනවා අවුරුදු දෙකක් යන තෙක් දෙපාර්ශ්වය අතර එකඟතාවකින් තොරව රටට හෝ ජනතාවට මෙම ගිවිසුම ප්‍රකාශයට පත් නොකර සිටිය යුතුයි කියලා. එහෙම කරන්න පුළුවන්ද මේ රටේ දේපළ පිළිබඳව. දේපළ අයිතිව තිබෙන්නේ ජනතාවට. මුදල් අමාත්‍යාංශ අමාත්‍යවරයාට හෝ එහි ලේකම් ආටිගලට පවරලා නෑ. ඒ නිසා මේ රටේ දේපළ පිළිබඳව අස්සන් කරන ඕනෑම ගිවිසුමක් ජනතාවට දැනගැනීමට අයිතිය තිබෙනවා” යැයි අනුර කුමාර දිසානායක මහතා පැවැසීය.

“මේකේ 3 (2) වගන්තියේ කියනවා ඉදිරි ගිවිසුම් අස්සන් කරනකොට ශ්‍රී ලංකා පවර් හෝල්ඩින් සමාගමට ළැදියාවක් සහිතව, අනුග්‍රහය දක්වන පරිදි ඉදිරි ගිවිසුම් අස්සන් කළ යුතුයි කියලා. ගිවිසුම ඉදිරිපත් නොකළ හේතුව දැන් පැහැදිලියි” යැයි හෙතෙම පෙන්වා දුන්නේය.

- අනුරාධා හේරත් (මව්බිම)